آشنای..شعر لری..
"زرآورد"
مِن زرآورد خيالُم كَوگِ دل بال ايزنه
تير تفنگي كِرده اِي دل كَوگَ مِن بال ايزَنه
مِن زرآورد خيالُم كَوگِ دل چال ايكنه
جاكَپَر برفَش نِشَهسِه تِيرهِ مال ايكنه
مِن زرآورد خيالُم هَركَ بِي يارش خَشِه
چالِيَلمون پُر خرنگ و بيلَهَرَل مِن تَشِه
مِن زرآورد خيالُم پُر كنيت پَن تير پرون
زين كنيتون اسبِ دلمَ تا برَيم "زنمَسكنون"
مِن زرآورد خيالُم هوفَ هوفِ باد اِيا
ميش و بز كارَي وَرارِن كُرچپونُم شاد اِيا
مِن زرآورد خيالُم ني بزن شادُم بكن
يا كه ايميرُم وَ عشقِش يا كه آبادُم بكن
مِن زرآورد خيالُم كُم زمين دِهرِهسَ بي
صفحَه صفحَش گُل نگين و بو چويل پيچِهسَ بي
مِن زرآورد خيالُم مَهسِ مَهس آبيدِمِه
چي گُلي وَر دَهسِ بادِ دَهسَ دَهس آبيدِمِه
مِن زرآورد خيالُم "آريا"ي عشقمي
كَوگِ مَهسِ چالِ "كوكَك" مِن هواي عشقمي
مِن زرآورد خيالُم كِهلَيِ دل بَهسَ بي
پاكريكي سر سَراَو بي سرتَوالُم خَهسَ بي
مِن زرآورد خيالُم شاعري دلخَهسَيَم
مِن "دِغَهزَل"دردَمندي عمريَه پابَهسَيَم
مِن زرآورد خيالُم پيتَ سر برفِش كُنُم
هرچه اِي دل پيت وَرارِه نيترُم وَصفِش كُنُم
"ابوذر شریفی نسب"
"کر زنگلو"
همه ایگن بهار اومیه ، سال و نویه
اما سر درویل هنی هم شلویه
کره دز نویسا من ایدشت و،صحرا
اسیر رگ و ریشه ی بنگرویه
درنگی و گوگ و تهی نی و چشمه
حروم نفس نحس کرزنگلویه
دوی سی دل دردَبارم نویسا
که مرگ َم دَ تی دردمون کشکلویه
خیا ، پیر و پیغمبری حرف مفته
دزی سربلندی ، درو آبرویه
امیدی و ای تیر و طیفه مبندیت
کلو عاقل آبییه عاقل کلویه
و دین بو مگردیت و مردی مجوریت
که کر کهخدا و دوور کیبنویه
"مجید نگین تاجی"
"بی انصاف"
ای بلـبــــــل سرحد بنشین گرمسیری
جونــــــــم سر لوم اومیه یعنی که تو دیری
انصافَ منش نی که مو وی حال خرابــــــم
قربون تو وابوم و تو سی ییک دَ بمیــــــــری
"مجید نگین تاجی"
"پل بور"
ذلم ایخوا همَی کَس کارمآبو
بنه پا سر تیم دلدارمـــــــآبو
همو لحظی قراریبو بمیــرم
پلِ بورش طناب دارمـــــآبو
"مجید نگین تاجی"
"شراب و برنو"
نه دل ویسا نه دلداری نه یاری نه باوینه ی نه بویی وه بهاری
سراغم ار ایی دونی که چی خوم شراب کهنه ی دشمن زیاری
****
نه دل ویسا نه دلداری نه یاری نه باوینه ی نه بویی وه بهاری
سراغم ار ایی دونی که چی خوم یه اسپی و یه برنو گرده داری
"مجید نگین تاجی"
"خرما"
قدت خرماُ پلت خرماُ رطب لوت
کلو کرده ولاته بوی مهلوت
گمونم ار خدا هم پشتم یسه
بمیرم آخرش بی تیر برنوت
"مجید نگین تاجی"
"شوسهون"
شوسهون ایله گروته، تش و تنگی بزنیت
منه ای چاله ی سهکور، خرنگی بزنیت
یو چه بدبختی ی که بهسه و جونت خونه
یو چه سرمایی که برنایه کمر افتونه
اور سه ويرکشه هر روز و بارونی نی
شوک گاله ایزنه و مرغ غزل خونی نی
یخ و سرمای ایزنه و تشک چراغه ایکشه د
سوم و سرتش همه ی دارل باغ ایکشه د
مو که نشنفتم و نییم زمسون ایطو بو
تک کنه حونه ی مردم و هوا شرطو بو
روزگاری همه جا کوگ و تهی بال ایزه
پازن مهس کلو لرکه ،من ای مال ایزه
تل و صحرا سبت سرخ شقایق ویبی
گل باوینه وری بشمییل عاشق ویبی
عشق ایخندس و موج ایزه زر سایه ی نار
زمسون دهس کمش نرگسه ایدا و بهار
پییز عاشقتر توسون و بهار ایبی دَ
تش و برق ایکه زمهسون و سوار ایبی دَ
بید مجنون پلش ایششت زر اور بهار
تیل باغ بر ایکه قد و بالَی گلِ نار
شونم ایبی دم عیسی و وگل جون ایدا
جونه صحرا و در و دشت و بیابون ایدا
دل مردم خش و زندی خش و خشتر دل دشت
نه صدای شربه و شیون نه صدای شوک پلشت
عشق ایباری و عشقه همی جا ایدیییم
زر بارون خدا زنده وعشق ویبییییم
قوم و خویش و در و همسایه ککا بیین دَ
سی دوای دردلشون دهس دعا بییین دَ
غضبی اومه یه دفه تش آبادی زه
تش هرچی غله و نون خدادادی زه
چشمه خشک آبی و بنگشت و تشنی جون دا
هر چه اور اومه فقط حسرتی و بارون دا
نفس نحس خومو بی که غزون وابیییم
دهس و پا بهسه ی زنجیل جنون آبییییم
نفس عشقه که جون اییه و زنده ی هممون
نفس عشقه نبوهه اجلت نیییه امون
عقل ومو داده خداوند که آدم بیمو
منه ای عمر دو روزه همه با هم بیمو
بین ای مردم ساویله دورنگی نکنیم
منه پوس بره و میش پلنگی نکنیم
ور بییمو چپ و راس و خط وخط بازی نَ
کینه و دشمنی و دوز و دغل بازی نَ
دینَ دنیا زر و ری کردنَ عادت نکنیم
علی آبیم و وته پشتَ عدالت نکنیم
پیر و پیغمبرِ ای مردمَ غارت نکنیم
غیر کعبه ی دلشو هیچه زیارت نکنیم
بختت ار کرده گل و نوم و نشونی داری
در و تخته ی ویک آبییه و نونی داری
نکنه نکبت سه، بنده ی میز آبی دَ
زر خالین ملت گَنده رمیز آبی دَ
قدر ای فرصت چند روزه نَ باید دونس
دیرتر تا که نوابییه دَ باید جُمس
اسبل زین بکنیتون و سوار آبیتو
قاصد اومین فصل بهار وابیتو
و گل و شونم و باوینه سراغی بگریت
سر هر کیچه ی سه کور چراغی بگریت
بشنفیت درد دل ای مردمه، بی درد نبیت
در حق مردمتون یی قذه نامرد نبیت
دو رکعت عشق بخونیت و یه کاری بکنید
من ای سه زمهسون فکر بهاری بکنید
"مجید نگین تاجی"
"بیداری"
عاقبت ماه ايزنه شوپر وه شو بار ايكنه
او شو ديار دس كجه دم ري همه خارايكنه
گله ي چپون خهسه پا وه مرگ گرگ بي حيا
كه پوس ميش كرده وه بر كرتك گلدار ايكنه
چشمه دوباره ايپكه ار نپكه ماه وه تيش
مشكل خشك خاله نَ دوباره او دار ايكنه
درخت سوز عشمون كه دم تور جونش گره
تجه ي دوباره ايزنه ميوه ي بسيار ايكنه
اگرکه مهث كوگ كُه سر زر برف وه كر كنيم
گراز گسنه ي زمسون پامون سر دار ايكنه
او سر ديار قابلي كه شو تيلش بهسه بي
ملكيشَ از نو ويركشه اسبش تيمار ايكنه
اگر كه ايل شوسهون بيا و ماه ن در كنه
ماه خو ايره و كهكشون خورشيد بيدار ايكنه
"مجید نگین تاجی"
تغییرات سایت
